Si ndihmës kuzhinier, Joni kryen me përkushtim çdo detyrë që i ngarkohet, duke ndihmuar në përgatitjen e gatimeve dhe sallatave të ndryshme për drekat e përditshme të rreth 35 të moshuarve dhe personave pa përkrahje familjare që jetojnë në qendër.

Kuzhinierja e qendrës, Pranvera Meta, e vlerëson Jonin si një djalë të përkushtuar dhe shumë punëtor. “Ai është i dëgjueshëm, korrekt dhe ka fituar respektin e të moshuarve,” – shprehet ajo.

Ndërkohë, administratorja e qendrës, Kristina Topalli, thotë se Joni është përshtatur shumë shpejt me punën dhe kolegët. “Ai është tepër korrekt në detyrat e tij dhe është bërë shpirti i të moshuarve. Shpesh ata kërkojnë që ushqimi t’u shërbehet pikërisht nga Joni,” – thekson ajo.

Nga ana e tij, Joni shpreh mirënjohje për familjen, e cila e ka mbështetur dhe e inkurajon të punojë çdo ditë më mirë dhe të jetë i respektuar nga të gjithë në qendër.