TETORI ROZË NË GRAMSH, MUNDËSI PËR EKO FALAS TË GJIRIT DHE TRANSPORT FALAS PËR MAMOGRAFINË

Dy mundësi të reja janë bërë të ditura për gratë e Gramshit gjatë muajit të Tetorit Rozë, në kuadër të kontrolleve dhe ndërgjegjësimit për shëndetin e gjirit.

Për herë të parë në Gramsh, gratë mbi 20 vjeç do të kenë mundësi të kryejnë EKO të gjirit falas në ambientet e Njësisë Vendore të Kujdesit Shëndetësor Gramsh. Shërbimi do të zhvillohet më 10 tetor 2026, ndërsa kapaciteti i përcaktuar është për 100 gra.

Sipas njoftimit, shërbimi realizohet në bashkëpunim me organizatën Doors of Life – Albania, e cila do të vërë në dispozicion tre mjekë specialistë: Prof. Dr. Maksim Cela, Dr. Bernard Progni dhe Dr. Rizvan Myrtaj.

Për shkak të numrit të kufizuar të vendeve, kërkohet rezervim paraprak. Gratë që dëshirojnë të kryejnë ekzaminimin mund të kontaktojnë në numrin 069 929 7614.

Një tjetër mundësi lidhet me transportin falas drejt Spitalit Rajonal të Elbasanit për gratë dhe nënat e moshës 45–65 vjeç, që dëshirojnë të kryejnë mamografinë. Kjo mundësi vijon prej pesë vitesh.

Sipas të dhënave të publikuara, vetëm gjatë këtij viti 310 gra janë depistuar në Gramsh përmes mamografisë së lëvizshme.

Për të përfituar nga transporti falas drejt Elbasanit, gratë duhet të regjistrohen pranë NJVKSH Gramsh ose të kontaktojnë në numrin e telefonit 069 929 7614.

Për gratë e Gramshit, këto janë dy mundësi konkrete për t’u informuar, kontrolluar dhe ekzaminuar, duke pasur akses në shërbime falas gjatë muajit të ndërgjegjësimit për shëndetin e gjirit.